Ghöz | SnG
上半部節目很開心
下半部轉場好憫憎
一早起身便執行李 check out
然後搭巴士去輕井沢舊區行街
一去到時好多鋪頭都未開門
好彩行吓行吓又有嘢睇又有心水
於是去食個蕎麥麵冷靜吓
然後便開始血拼
喺舊區行完買完又搭巴士返 outlet 繼續
最後喺輕井沢都盡興凱旋
好滿足地搭新幹線去湯沢
但惡夢的轉場便開始
新幹線有誤點已經唔正常
班車又勁多人滿哂
不過我哋買指定席都好啲一定有位坐
但架車又冇行李架又滿晒人
仲要班車遲到要喺月台特多廿分鐘
最慘係去到湯沢落車時落大雪
拖住件行李仲要條路又濕又大雪
行到對防水鞋都濕晒真係好麻煩
最後去到酒店仲大鑊
冇 lift 仲要住三樓
又凍又濕仲要搬喼上兩層樓梯兩次
真係 EQ 與體能大考驗
最最最後仲要趕住食完晚飯去沖涼
間酒店房冇得沖要落大浴場先有得沖涼
仲要指定時間
雖然理解但心中不是味兒
今日都係上晝去滑雪
下晝滑完雪就去 outlet shopping
不過個雪場下晝勁多人
排隊搭 chair lift 都要排十五分鐘
個場又唔大
排十五分鐘但滑落嚟只需兩分鐘
真係幾冇癮
滑先雪收工後就去行 outlet
五點幾行到七點幾
兩個幾鐘真係唔夠時間
不過收穫都唔錯
Shopping 完畢就喺 Outlet 食埋晚餐
然後便返酒店執行李了
新的一年希望都順順利利健健康康
今天行程唔趕
但節目豐富
食飽早餐就去滑雪
新裝備加租板雖然唔習慣
但滑吓滑吓就感覺返晒嚟喇
不過個場勁細
當三年冇玩練習吓啦
玩到三點幾就收工
返酒店休息一陣又出發去 Outlet 行街
鎖定目標但冇買嘢
諗住聽日先出手
行完街就去食晚餐
今晚打邊爐不過係日式果隻
五花腩加和牛非常美味
食飽便返酒店梳洗休息聽叱吒
非常圓滿的一年開始