今日收工返到屋企時
信箱有封警察交通部寄嚟嘅信
起初以為係星期日途經清水灣道的中槍信
拆開後原來係前排交通意外嘅調查結果
大概意思同之前打電話比我時講嘅差不多
都係冇證據顯示有人需要負責
所以唔會對雙方作出起訴
我對結果一啲都唔意外
由始至終負責調查果位交通警
比我嘅感覺都係唔想做咁
咁嘅結果好正常丫
而我架車都完成維修光復如新
就當吸收教訓破財擋災啦
完了吧
驚喜
今天攞返架車喇
整完嘅效果好滿意
雖然價錢偏貴
但噴色睇唔到有色差
感覺同之前完全一樣
比預期好好多
真係非常開心
攞完車後入去西貢食個brunch
但途經清水灣道遇到雷射槍
疑似被中槍但又冇叫我停車
希望係自己嚇自己啦
希望唔會過兩日會收信啦⋯⋯
RAV4留院維修
繼細房重置工程開動後
RAV4 維修相繼展開
師傅話預計三至四天起貨
希望整好後唔會太醜樣啦
沒有新進展
今日都安排了很多任務比自己
首先一起身就去葵涌整個微波爐
不過要放低檢查再報價
但喺呢個時候警察打嚟
同我約時間錄口供
所以就突然加插了去九龍灣錄口供
原本諗住大把時間
點知去到鑽石山開始塞車
因為彩虹天橋上面炒咗車
去到警署好彩冇遲到
不過果位警察就因為有案件所以出咗去
所以要轉頭再嚟過
摸門釘後去食個lunch
食飽後便再回去錄口供
去到等咗一陣
然後那位警察便帶我入去佢個書桌
又再講一次當時發生的情形
然後佢又慢慢用隻 mouse click click 吓輸入中文口供
冇錯係用 mouse click click 吓
佢用嘅係九方輸入
但唔係用個 num pad 輸入
可想而之佢嘅”打字”速度有幾慢⋯⋯
幾經辛苦見佢打好喇
但好多別字錯字港式文法
如果考試作文一定好低分⋯⋯
對完一輪又要畫圖
畫番當時事發的位置
畫完又要等佢處理另一案件後先繼續
攪咗成粒鐘
錄好口供但其實都係冇乜進展
都係又繼續等警察做嘢
今次佢話可能要等半年
最快都七月先知下一步會點
現階段都係冇嘢做到得個等字
離開差館後便繼續今天安排好的任務
去到宜家買料安裝上牆層架
但無意中又發現到個書枱櫃桶
雖然係陳列品但只售一百三十幾蚊
個款非常啱用又襯番屋企傢俬
所以 shopping 嘅嘢都係撞手神
突登搵未必搵得啱
但無意中又會買到筍嘢
買齊料後便返屋企
原先諗住下午買完返到屋企即刻裝埋
但因為突然去錄口供冇咗兩個鐘
所以又要留待有空才做了