今次都算快手了
十日便執好相放埋入去個 site
選用 Photo Gallery 都算係唔錯嘅決定
初時未熟習有點陌生
但用落便發覺就算係免費版都已經夠哂用
雖然個介費係最舊款果啲
不過主要內容都係睇旅行嘅照片
用作記錄吓等日後可以慢慢回味
終於完成個立山相簿
旅行後歸來
琴晚成一點先返到屋企
執吓嘢沖個涼後差不多三點先瞓
今天又出奇地十點幾就醒
起身繼續執嘢然後買嘢過外家食
然後又返屋企繼續清理旅行後的事宜
洗衫晾衫執吓相片
備份好旅行嘅資料
收拾旅行喼同袋
夜晚又去阿妹家吃晚飯
好似好忙但又冇咩做過就一天了
好在還有明天假期可以 hea 多日先返工
立山之旅．Day10．最後一擊
踏入最後一天旅程
起身後便去食個早餐
然後最後衝剌
先去 TOKYUHANDS 行吓
卒之心郁郁又買咗個 Made in Japan 嘅 Porter袋
跟著再去 Onitsuka Tiger 睇吓對鞋有冇 size
試完又 okay 喎
連續購入兩件 Nipon Made 真係好興奮
之後我哋行返過去歌舞伎町果邊睇錶
行了幾間都冇心水
於是正式鳴金收兵去食個 tea
然後回酒店執好啲戰利品
便起程去成田機場返屋企了
個多小時火車去到機場
但 check in 又等了幾個字
前面有班人又要執喼又要攪呢樣攪果樣
好似成間航空公司淨係服侍佢哋咁
完全唔理其他人嘅感受
真心覺得呢家航空公司啲員工唔易做
輪到我哋就好快攪掂然後便行去安檢
到安檢又唔知攪乜又排咗半粒鐘
好不容易先入到禁區
再食個快晚餐便去上機
經過五粒鐘機程
我哋又回到現世又要準備每天辛勞工作
然後期待下次嘅旅程了
立山之旅．Day9．Snow Peak & Omega
今天行程輕鬆
起身後輕食東橫inn早餐
然後便出發去昭島
原本需時只是四十幾分鐘
但兩條茂里唔識轉車
當發現時已經去了老遠
所以又要搭回頭車去返轉車站轉車
卒之用了兩個鐘多啲先到達目的地
去到昭島已經十一點九
於是早啲食個 lunch
跟著便行去過去 MORI PARK Outdoor Village
行幾分鐘便可到達
但我們選擇行吓條昭和之森嘅銀杏路
條路兩旁種滿銀杏樹
現時季節樹上滿是金黃樹葉十分漂亮
中間還有一間 BBQ Cafe
可以燒個野食可惜我們已經吃飽
如果唔係應該會有去燒個雞翼
我哋影吓相拍吓片後便行個去今天主打地方
一去到會見到個戶外攀石場
有人正在練習
看了一陣便開始 window shopping
間間店到各有特色
喜歡戶外活動同行山露營的話真係會好興奮
行完便入去 Snow Peak Eat 朝聖
間餐廳用具絕大部分都是用 Snow Peak 自家產品
包括刀刀义义枱枱櫈櫈
就算唔食嘢都要入去坐吓飲杯嘢
平時買唔起現在可以全部都用 Snow Peak 真係開心
食完玩完便起程過去上野行街 Shopping
今次係第一次去上野
之前聽人講話好熱鬧好多嘢買好多嘢食
親身去到真係覺得正
成條街都有小食可以掃街
同埋有好多古著同時候
我哋行了一圈後都發現心頭好
經過短暫爭扎後便又再去上果間店
左諗右諗再試上手真係不得了
愛不釋手價錢仲要係射程之內
仲有免稅同信用卡或現金都一價
卒之受唔住誘惑帶咗佢返歸
買完人生最貴嘅手錶之後
便去搵嘢食
今晚最後晚餐選擇了食炭火燒肉
店舖很舊但價錢同食物都好相宜
我哋食咗和牛五花腩、牛助肉、牛舌、牛大腸
仲有豬脆骨、雞腎、雞軟骨同雜菜
仲叫咗個泡菜蘿白
真係飲飽食醉便返歸
但返到新宿見到勁熱鬧
成條街都開滿走鬼店鋪
走去八吓先知原來有個大酉祭
咁啱我哋又得閒
於是便去行個圈感受吓熱鬧
行了一圈見到人山人海
真係似行花市
行完運完吉便回酒店
執拾行李準備明天歸家了