很久前已經留意這支鏡頭
但睇嚟睇去都係甩皮甩骨
一係就歐畢
終於有一日見到有人放支似樣嘅
於是曝咗幾日好彩臨門一腳冇躂 Q
等咗成個星期運到嚟真係開心到彈起
支鏡停產多年
有支齊料又靚仔嘅真係好難得
雖然比支定焦 20mm f/2.8 重多三百克
但焦距就多咗變焦到 35mm
而且大小適中
實用大大提升
希望不久將來去旅行可以大派用場啦
鑽石廣角
又到週末
十點就起身
Hea 一陣就出去觀塘
今次試吓龍皇飲茶
質素都幾好下次可以再幫襯
飲完茶就去睇吓相機
買咗幾筒菲林試機
跟著就去買部睇咗好耐嘅磨豆機
之後便返屋企試機喇
又要試磨豆機又要試菲林相機
真係好多嘢玩
但今晚又約咗人去家訪打機去 camp mode
於是又匆匆忙忙開車過去
然後都係飲飲食食吹水打機
玩到凌晨三點先走人返屋企
好耐冇試過連續兩個週末都咁好節目了
藝術品
琴日收到部機已經開心到喊
今日測試完更加興奮
所有嘢都在狀態
快門聲清脆！
快門簾爽快！
自拍掣冇問題！
最正係測光錶工作正常仲要都幾準確！
對焦屏有少許塵但可接受！
外觀一流！
四十幾年嘅機械相機真係一件工藝品！
開心到喊
20円買到一支 43-86mm f3.5光圈變焦鏡係乜嘢概念？
2800円買到一部 1975 年生產嘅 Nikomat FT2 舊相機再加一支定焦 35mm f2.8 大光圈鏡頭又抵唔抵？
對我嚟講唔洗三舊水買到心頭好
而且收到貨見到品相好好仲要係操作正常
果種心情真係開心到好似何詩蓓勇奪銀牌咁高興
當然計埋運費手續費加加埋埋
埋單實付七百二十幾蚊啦
之但係一機兩鏡咁嘅價錢買到自己喜歡嘅玩具
叔叔真係覺得超值囉